«Առաջատար տեխնոլոգիաների ձեռնարկությունների միություն» ՀԿ-ն ՀՀ վարչապետի բարձր հովանու ներքո արդեն 6-րդ անգամ հրավիրել է Բիզնես ինովացիոն համաժողով։ Ամենամյա համաժողովի այս տարվա խորագիրն էր՝ «Հայաստանի արդիականացման ճանապարհին»։
Նոյեմբերի 30-ից դեկտեմբերի 1-ը դիլիջանյան համաժողովում քննարկվել են հետևյալ թեմաները՝
• Կրթության զարգացումը Հայաստանի բարձր տեխնոլոգիաների ոլորտում
• Բարձր տեխնոլոգիաների արդյունաբերության զարգացումը ՀՀ մարզերում
• Կիբեր անվտանգությունը Հայաստանի տնտեսությունում
• Աջակցություն Հայաստանում գիտության և նորարարության զարգացմանը։
ՀՀ Տրանսպորտի կապի և ՏՏ նախարար Հակոբ Արշակյանը ներկայացրել է Հայաստանի նորարարության և առաջատար տեխնոլոգիական ոլորտի զարգացման ազգային ռազմավարությունը:
Համաժողովի շրջանակում Ազգային անվտանգության ծառայության պետ Արթուր Վանեցյանը և ԱՏՁՄ-ի գործադիր տնօրեն Կարեն Վարդանյանը ստորագրել են «Հայաստանի կիբեր անվտանգությունն ապահովելու ոլորտում» համագործակցության մասին հուշագիր: Կողմերը պարտավորվել են իրենց փորձառությունը ծառայեցնել ՀՀ կիբեր անվտանգության ոլորտում խնդիրների բացահայտմանը և լուծումներ մշակելուն, պատերազմական դրության ժամանակ անխափան համագործակցել՝ ազգային անվտանգություն ապահովելու նպատակով:
Բիզնես ինովացիոն համաժողովը գործարար քննարկումների, ինովացիոն գաղափարների հավաքագրման արդյունավետ հարթակ է, որի շրջանակում մշակվում է Հայաստանի արդիականացման ծրագիր: Այն մեկտեղում է ՀՀ կառավարության և Հայաստանի տնտեսության, գիտակրթական, առաջատար տեխնոլոգիական ոլորտի ընկերությունների ներկայացուցիչների։